المنبر التونسي(كلثوم كنو) – إثر مأساة الجلسة الخمرية ب”القوارص” التي أسفرت عن وفاة 7 من شباب القيروان، نشرت القاضية السابقة والناشطة الحقوقية كلثوم كنو الواقعة التالية :
“باش نحكيلكم على واقعة أليمة صارت في القيروان في آخر ايمات رمضان 2005 ونتصور الي برشا قراوة يتفكروها قبل ليلة 27 بنهار وبعد شقان الفطر اتصلت بيا فرقة الابحاث العدلية باعتباري قاضية تحقيق مكلفة بحصة الاستمرار وأعلموني بوقوع جريمة قتل سائق تاكسي في منطقة النبش القريبة من حدود معتمدية أولاد الشامخ.
بدون ما ندخل في التفاصيل المؤلمة وبعد ما تنقلنا وقمنا بالاجراءات اللازمة اقترب مني شخص ووشوشلي في وذني وقالي الي عملو العملية أولاد فولان بطبيعة طلبت من اعوان الحرس الي كانو معايا باش نتنقلو للجهة الي يسكنو فيها وهنا حصلتلي الصدمة كيف وصلنا لدار المشبوه فيهم صدقوني تصدمت في الحالة الي شفتها . فما بيت وحدة يسكنو فيها الأب والأم وزوز عزاب وزوز صبايا ومعهم معزتين ودجاج . ما فما لا فرش لا خزانة ولا شي كل شي في القاعة ما نحكيلكمش على الحالة الحالة المزرية .
بعد ما فركسنا المكان و ما لقيناش المشبوه فيهم خرجنا نبحثوا في الجهة قلنا اكيد متخبيين قريب ونزيد نتصدم مرة أخرى بوضعية أتعس اتصورو رجل وزوجته عايشين في زريبة علالش بيتهم عبارة على حفرة مغطية بقطعة زنق ما فيها شي. قلت في قلبي يا ربي توة مازال الناس يعيشو في مثل الحالة هذي في تونس وساكتين !!!! ما نطولش عليكم . بعد ثلاثة أيام تم القبض على زوز اخوة وولد عمهم الطفل الي ارتكب الجريمة بعد استدراجه لسائق التاكسي على أساس باش يوصله من وسط مدينة القيرون لمنطقة النبش وهو كان في الحقيقة مخطط مع شقيقه وابن عمه باش يسلبوه فلوسو كيف تفطن السائق لما وصل للنبش الي الراكب ما عندوش فلوس حب يشدو من الكابيش متاعه ياخي الطفل غرسلو سكينة في فخذه والاصابة جات في عرق قاتل والسائق حاول يلتحق بالمجرم لكن للاسف ما نجمش خاطر فقد برشا دم وكان مريض بالسكر وتوفى بعد فترة قصيرة الله يرحمه.
عاد كيف نستنطق في المتهم الرئيسي ومن بعده شقيقه أكدولي الي عمرهم ما كانت عندهم نية القتل لكن كانت نيتهم وضع كمين لسائق سيارة اجرة لافتكاك امواله قصد شراء كمية من اللحم لاعداد كسكسي ليلة 27 من رمضان وقالولي الي عائلتهم عندها أشهر ما ذاقوش أي نوع من اللحم كملت نستنطق وكملت نحثت في الملف وأنا نقول ينعل بو الفقر الي يخلي شباب يرمي نفسه في المخاطر وفي السجن ويحرم عائلة الهالك من الاب والزوج والابن والاخ #الفقر #أهم #أسباب #انتشار #الجريمة”..
